كلمتين يامصر....أحمد فؤاد نجم

كل عين تعشق حليوة
و إنتي حلوة في كل عين
يا حبيبتي أنا قلبي عاشق
و اسمحيلي بكلمتين
كلمتين يا مصر يمكن
هما أخر كلمتين
حد ضامن يمشي آمن
أو مِـآمن يمشي فين


..........................


شابة يا أم الشعر ليلي
و الجبين شق النهار
و العيون بحرين أماني
و الخدود عسل و نار
و اللوالي بابتسامتك
يحكوا أسرار المحار
يللي ساكنة القصر عالي
إمتى يهنالي المزار
كلميني يا صبية
طال علي َّ الانتظار
كلمتين يا مصر يمكن
هما أخر كلمتين
حد ضامن يمشي آمن
أو مِـآمن يمشي فين

.....................

قصرك المسحور غيلانه
أغبى من دود الغيطان
بعد مص الغصن الاخضر
ينحتوا عضم العيدان
و اللي خلى الارض خضرا
و اللي خلى الدار آمان
عاش بجوعه ملو جوفه
مات بخوفه من الغيلان
روح الغلبان
ما قالشى عن شقا العمر اللي كان
كلمتين يامصر يبقوا
هما أخر كلمتين
حد ضامن يمشي آمن
أو مِـآمن يمشي فين

....................


أدي كلمة من عذابي قلتهالك
باقي كلمة
من حنيني صنتهالك
في الضلوع من دنيا ظلمة
كنت خايف يلمحوها
يقتلوها في سكة ظلمة
شقشقت و النور بشاير
زهرة الصبار يا سلمى
يا نسيم الشوق يا طاير
خد لمصر الصبح كلمة
طول ما يبقى الركب ساير
بالبصاير و العينين
يبقى ضامن يمشي آمن
يبقى عارف يمشي فين

قال صلى الله عليه وسلم (اذا أراد الله بعبد خيرا استعمله...قيل كيف يستعمله يارسول الله؟
قال يوفقه لعمل صالح قبل الموت )
دوام التوفيق للمنتدى والقائمين عليه