كيف تفوز برمضان

كيف تفوز برمضان
محمود المصري



الحمد لله نحمده ونستعينه ونستغفره ونعوذ بالله تعالى من سيئات أنفسنا ومن شرور اعمالنا ... من يهده الله فلا مضل له ومن يضلل فلا هادي له .... أما بعد



نحن اليوم مع موعد مع درس غال بمناسبة قدوم هذا الضيف الغالي .... هذا الدرس بعنوان "كيف تفوز برمضان؟" نسأل الله أن يجعلنا جميعا من الفائزين ومن عتقاء الله من النيران إنه ولي ذالك والقادر عليه



شوف قد ايه ربنا بيحبك .. أنا عايز أبدأ الدرس ده بالحتة دي بالذات ... شوف قد ايه محبة ربنا ليك ... كان ممكن ان انت تموت قبل ما تدرك شهر رمضان .. لكن من حب ربنا ليك انه أمهلك وطول عمرك لحد ما أدركت شهر رمضان علشان يغفرلك ويعتق رقبتك من النار وعلشان يدخلك الجنة ... فياريت تصوم السنة دي صوم المحب لربه ... تذكر ربك ذكر المحب لربه ... تصلي صلاة المحب لربه

تخيل معايا .... لو إن أحب الناس اليك غايب عنك بقاله 11 شهر ... وفجأة جالك تليفون إن فلان وصل ... ومستنيك دلوقتي في البيت .... تحس بفرحة عاملة ازاي ... وده أحب الناس اليك .... تخيل بقى ان الشخص ده .. شهر رمضان ... غايب عنك بقاله 11 شهر ... وجاي بكره ... وبيقولك : أنا الضيف الغالي ...أنا اللي من خلالي لو قدرت تعمرني بالطاعة بفضل الله ممكن تكون من اهل الجنة

لفته جميلة جدا ... عارفين شهر رمضان ده بين الشهور عامل زي ايه ..؟ عامل زي يوسف عليه السلام بين أولاد يعقوب .... شهر رمضان بين الـ 12 شهر زي يوسف بين الـ 12 ابن ... وكما أن يوسف كان أحب الأولاد إلى يعقوب ... فشهر رمضان أحب الشهور إلى علام الغيوب جل في علاه ... وزي ما سيدنا يوسف ربنا مكنه من إخوته بعد ما أذوه كان فيه من الحلم والعفو ما غمر جفاهم فقال لهم : { لا تَثْرِيبَ عَلَيْكُمُ الْيَوْمَ يَغْفِرُ اللَّهُ لَكُمْ وَهُوَ أَرْحَمُ الرَّاحِمِينَ } فنفس الحكاية ... المعاصي اللي انت ارتكبتها طول الشهور الـ 11 تيجي في شهر رمضان تجد فيه من الرحمة ومن البركات ومن العتق من النيران ومن الغفران ما يغلب جميع الشهور


الاستعداد لشهر رمضان من تعظيم شعائر الله ... يقول جل في علاه { ذَلِكَ وَمَنْ يُعَظِّمْ شَعَائِرَ اللَّهِ فَإِنَّهَا مِنْ تَقْوَى الْقُلُوبِ } ... علشان كده أنا عايز أسالك قبل ما أبدا الدرس ده سؤال واحد ... عمرك فكرت قبل كده ولو مرة إنك تعمل خطة لدخول الجنة ..؟ عايزك تفكر فيها الليلة دي ... مش معنى كلامي انك هاتدخل الجنة بعملك .... دي مجرد أسباب لكن السبب الحقيقي لدخول الجنة هو رحمة الله عز وجل ... اهل الباطل بيستعدوا للباطل بتاعهم قبل المناسبة بأيام كثيرة جدا بل بشهور .... فما ظنك بقى وانت داخل على شهر رمضان ... يعني داخل على جنة عرضها السماوات والأرض ... دا حتى الفريق القومي لما بيدخل بطولة أو دورة أفريقية بيقعد يجهز نفسه قبلها بست شهور .... معسكرات تدريب في المانيا وبلجيكا وانجلترا .... وفي الآخر برضه بيتغلبوا

..... فكيف لا نستعد نحن لجنة عرضها السماوات والأرض ...يا شباب دا السماوات السبع كلها بتستعد استعدادات خاصة جدا لاستقبال رمضان ..... عايزك تتأمل معايا حالة الاستعداد وحالة الطوارئ التي تكون في أول ليلة من شهر رمضان المبارك ... حالة طوارئ اغرب من الخيال ... اسمع لكلام حبيبك عليه السلام {إذا جاء رمضان فتحت أبواب الجنة وغلقت أبواب النار وصفدت الشياطين} ... عايزك تتخيل كده أول ليلة في رمضان ... بص كده للسماء وتخيل وعد الصادق

إن دلوقتي حالا .. حالا إن أبواب الجنة بتتفتح ... حسيت الاحساس ده قبل كده ؟ ... حسه كده معايا ... ابواب النار دلوقتي بتتقفل ... فرصة عظيمة جدا للي عايز يتوب... أنا عايزك تركز معايا طول الدرس على النداء ده {فيا باغي الخير أقبل } تعال تعال ... ياللي ما لبستيش حجاب بقى لحد النهاردة تعالي البسي حجابك بقى النهارد دة .. ياللي ما بتصليش تعالى بقى صلي .... كفاية بقى معاصي ... ياللي بتدخن او بتشرب مخدرات أو خمرة تعالى بقى توب إلى الله ... ياللي عايز تصلي .. ياللي عايز تذكر ربنا ... ياللي عايز تقرا قرآن ... ياللي عايز تبر والديك .... {ويا باغي الشر أقصر} كفاية بقى معاصي .... الحق نفسك ... محدش عارف يأتي الموت .... {ولله عتقاء من النار وذلك في كل ليلة} اقف معايا مع اللفظ ده كده .... عايزك في أول ليلة من رمضان تذل نفسك لله ... قول يارب ... عتقت رقبتي من النار الليلة دي ولا لسة ..؟ تعالى الليلة التانية وقول يارب ... لو ما كنتش عتقت رقبتي الليلة اللي فاتت اعتقها الليلة دي ... وكل ليله اسأل ربنا لحد لما تيجي عند آخر ليلة تقول يارب .... مبقاش غير الليلة دي ... إن ما كنتش عتقت رقبتي في الـ 29 اللي فاتوا ... اسالك بإسمك الأعظم انك تعتقها الليلة دي ... وابكي بين ايدين ربنا سبحانه وتعالى

تعالوا يا جماعة نعمل خطة قبل دخول شهر رمضان علشان نفوز بجنة الرحمن سبحانه وتعالى ... قلنا أن فرق الكورة لما بينزلوا الملعب بيلعبوا بخطة أغلبها بتكون 4-4-2 .... بس احنا بقى مش هانلعب احنا هانعمل بـ 4-4-2... ايه المقصود بالكلام ده .... ؟ هانعمل يا شباب أربع حاجت قبل رمضان وأربعة في رمضان واتنين بعد رمضان



هانقولهم بس لما نسمع الصلا ة على النبي ....

خطة رمضان



أولا: قبل رمضان ..... (خط الدفاع)

1- معرفة فضل رمضان و فضائل الصيام لأ ن الواحد لما يعرف عن الحاجة أكتر هايجتهد علشان يفوز بيها أكتر :

1- أفضل عبادة من العبادات هي الصوم

2- أجر الصيام غير معروف قال جل وعلا في الحديث القدسي {إلا الصوم فإنه لي وأنا أجزي به}

3- للصائم فرحتان .. فرحة عند فطره وفرحة عند لقاء ربه

4- خلوف فم الصائم أطيب عند الله من ريح المسك

5- الصيام هي العبادة الوحيدة التي لا يمكن أن يكون فيها رياء

6- الصائمون هم السائحون

7- الصيام شعار الأبرار

8- الصيام يقطع أسباب التعبد لغير الله

9- الصوم شكر للمنعم على نعمه

10- الصيام يحض على كثرة الطاعات

11- الصيام يجعل المرء يكثر من الصدقات والاحسان للفقراء

12- أكبر حكمة للصيام هي { لَعَلَّكُمْ تَتَّقُونَ }

13- رقة القلب وصيانة الجوارح

14- الصوم في الشتاء هو الغنيمة الباردة ... لأن الشتاء نهاره قصير وليله طويل

15- إن الله وملئكته يصلون على المتسحرين .... والسحور عون على الصيام فما بالط بالصيام

16- الصوم جنه .... لأنه يجعلك تمسك عن الشهوات

17- الصائم له دعوة لا ترد .... فبالله عليك محدش فيكم يا أخوة أو يا أخوات يعدي عليه رمضان من غير ما يدعي لللإسلام والمسلمين ... إن ربنا يرفع البلاء عن الأمه

18- الصيام يعين على التوبة ....

19- من صام رمضان ايمانا واحتسابا غفر له ما تقدم من ذنبه

20- الصائم في عبادة ولو كان نائما على فراشه

21- الصيام يشفع لك في القبر ويوم القيامة .... فهو جنة من النار

22- من ختم له بصيام يوم دخل الجنة

23- أن في الجنة غرفا يرى ظاهرها من باطنها أعدت لأربعة منهم ..... من تابع الصيام

24- باب الريان .... باب مخصوص لأهل الصيام

25- الصيام سبب في رفعة الدرجات في الجنة

ٍ

بعد ما فتحنا الكاتالوج ... وشوفنا مناقب الصيام ... أنا عايزك تخرج الليلة دي وتقول أنا هاصوم رمضان ده بالذات .... صوم المحب لربه



2- التوبة ..... ودايما بقول يا شباب وبكرر وكل سنة .... متى يتوب من لا يتوب في رمضان ؟.... اليس من الحسرة أن يعفو الله عن مئات الألوف من البشر .... ولم يعفو عنكم ..... خاب وخسر والله من علم أن الله فتح له أبواب الجنة ثم هو يعصي الله ليكون من أهل النار .... شوف كام رمضان عدى عليك ... ورغم ذلك انت ما توبتش ... بل ازدت من الذنوب والمعاصي .... فعايزين كلنا يا جماعة نتوب .... عايزين نفتح صفحة جديدة الليلة ... قبل مايدخل علينا رمضان ... ويعدي ... واحنا لسة ما توبناش .... بالله عليك جو رمضان ... ما يشجعكش على التوبة ... الروحانيات اللي بتحسها في رمضان .... ماتشجعكش انك تسيب المعاصي



3- التحلل من المظالم .... وما أدراك ما المظالم ...؟ أخي الحبيب ... ازاي انت ترضى تصوم وتصلي ... وتدي حسناتك لغيرك ... {قال

: أتدرون من المفلس ؟ قالوا : المفلس فينا من لا درهم له ولا دينار فقال

: المفلس من أمتي من يأتي يوم القيامة بصلاة وصيام وزكاة وحج ويأتي وقد شتم هذا وضرب هذا وأكل مال هذا وسفك دم هذا , فيعطى هذا من حسناته وهذا من حسناته فإن فنيت حسناته اخذ من سيئاتهم فطرحت عليه فطرح بها في النار } ... أنا عايزك بس تستحضر معايا المشهد ده .... تيجي يوم القيامة تلاقي الصيام اللي انت صومته ده كله والجوع والعطش والقرآن ... وكل ده حسناته جبال قدامك ... والحسنات دي عماله بتتوزع على الناس وانت شايف ده قدام عينيك .... حسرة كبيرة ولا لأ ...؟



4- الإكثار من الطاعات قبل دخول رمضان ... ليه ؟ ... علشان تمرن عضلات قلبك ان انت قلبك يكون جاهز لكل طاعة ... قلبك جاهز للبكاء ... جاهز للخشوع .... لذلك لما تلاقي لاعب الكرة لو كان بعيد عن الملاعب ونزل يلعب من غير تمرين هايجيله ايه ..؟ هايجيله شد عضلي ... انت لو دخلت على الصيام من غير ما تمرن عضلة القلب .... هايجيلك شد قلبي .... علشان كده لازم تعود نفسك على صيام النافلة ....



ثانيا : في رمضان .....(خط الوسط)

1- الاستعانة بالله ... ودي في نظري أعظم حاجة ... أوعى تفتكر انك لما تصوم رمضان وتقرا القرآن أوعى تفتكر ان ده بجدعنتك وشطارتك واجتهادك .... ده كله فضل ومنه من الله ... لا يعان إلا من أعانه الله ... فالزم دعاء {اللهم اعني على ذكرك وشكرك وحسن عبادتك} في دبر كل صلاة ...

2- ستثمار كل لحظة في طاعة الله ... أوعى تعدي عليك في رمضان إلا وانت عارف انت بتعمل ايه ... قال

: {نعمتان مغبون فيهما كثير من الناس .. الصحة والفراغ}... هاتندم والله لو عدى الشهر وفاز فيه من فاز ... وانت مش معاهم

3- التأمين على العبادة بالدعوة إلى الله .... إن انت ربنا يكرمك وتحاول على قدر الإمكان انك تدعو إلى الله عز وجل فيأتي واحد ... الواحد ده لما يجي .... هايكون ثوابه في ميزان حسناتك ...{ولأن يهدي الله بك رجلا واحدا خير لك من حمر النعم}

4- حسن الظن بالله ... انت صومت وقمت وقرأت القرآن ... وعملت كل حاجة ... في النهاية يقبل أو ما يقبلش ؟... خلي عندك حسن بالله ...{ أنا عند ظن عبدي بي فليظن عبدي بي ما يشاء}



ثالثا : بعد رمضان .... (الهجوم)

1- ان انت تثبت على الطاعة ... لأن علامة القبول الحسنة بعد الحسنة ... شهر رمضان بالذات ... عايز تعرف ربنا قبل منك هذا الشهر ولا لأ ... بص انت هاتعمل ايه بعد رمضان ...لو انتكست بعد رمضان ده علامة خذلان ... لو اجتهدت بعد رمضان يبقى ده علامة قبول بإذن الله عز وجل .... لكن أنا عايز أسأل سؤال .. ايه اللي بيخلي كتير من الشباب ينتكس بعد رمضان ؟ ... لانه لم يلجا إلى الله ولم يسأله الثبات ... ولأن الإسلام مش قضيته الأولى ... علشان كده ربنا بيقول { وَلا تَكُونُوا كَالَّتِي نَقَضَتْ غَزْلَهَا مِنْ بَعْدِ قُوَّةٍ أَنْكَاثًا } .... انا عايزك تتخيل الموقف ده ... واحدة عمالة تغزل مثلا ... بلوفر ... وبعد ما تعبت فيه جت عند آخر الخيط وقامت فكاه كله ... بالله عليك دي إنسانة عاقلة؟ ....

2- أن تشكر الله أنه وفقك على صيام وقيام روضان .... لأنك انت لم توفق أل ان وفقك الله .... وإنت ان وفقت للصيام والقيام وكل الطاعات لا يكون ذلك إلا بمحض منة وفضل من الله عز وجل .... فالمعان من أعانه الله عز وجل .... { شَكَرْتُمْ لأَزِيدَنَّكُمْ }





ده كان الموضوع يا شباب .... أوعى تشغل نفسك عن رمضان ... شهر المغفرة .. شهر الرحمة ..شهر العتق من النيران.... شهر الخير ... شهر البركة .. شهر الطاعة .... أوعى تشغل نفسك عنه بدنيا ... عن طاعة الله .. وعن مواسم الرحمات والبركات ...



سبحانك اللهم وبحمدك نشهد أن لا إله إلا أنت نستغفرك ونتوب إليك

وجزاكى الله كل الخير همسة
وشكرا على مرورك بالموضوع
دا كلام الشيخ محمود المصرى
ربنا يجعلنا من الفائزين برمضان